Como temos informado nos últimos meses, neste sábado dia 12 de Dezembro, reuniu-se em Vigo a V Assembleia Nacional de NÓS-Unidade Popular, umencontro que o companheiro Alberte Moço, encarregado de pronunciar o discurso final em nome da Direcçom Nacional, definiu como “de grande utilidade”, dado o alto nível do debate e as numerosas intervençons.

Após Compostela, Corunha, Ferrol e Teio, foi a vez da maior cidade operária galega. Os companheiros e companheiras da comarca encarregárom-se do relativo à recepçom da filiaçom que se deslocou de diferentes pontos da Galiza para um encontro especialmente útil, sobre os diversos temas de actualidade do calendário político estável em que NÓS-UP está a desenvolver iniciativas no dia a dia.

Todo o relativo à vida política do nosso projecto foi tocado abertamente polas companheiras e companheiros que participárom nesta Assembleia Nacional. Desde as finanças até a introduçom no movimento popular, passando polo trabalho sindical e o feminista, NÓS-Unidade Popular actualizou as coordenadas da sua actuaçom política consoante as novas características da situaçom sociopolítica e económica da Galiza.

Após o discurso inicial de Maurício Castro, introduzindo os principais temas incluídos nos textos, os debates prolongárom-se toda a jornada até as oito da tarde, em que foi proclamada a nova Direcçom Nacional, que inclui algumhas substituiçons e garante a continuidade do trabalho político feito. Numha situaçom adversa por causa das próprias circunstáncias de divisom soberanista, que parte dos anos 70 e nom tem fácil soluçom no curto prazo, a nossa organizaçom marcou a linha política desta nova etapa da maneira mais democrática, certificando o alto grau de unidade e coesom que caracteriza a nossa corrente.

Alberte Moço Quintela, Noa Rios Bergantinhos, Maurício Castro Lopes, Patrícia Soares Saiáns, Bruno Lopes Teixeiro, Lara Soto Gonçalves, Ramiro Vidal Alvarinho, Sheila Fernandes Migues, Carlos Morais Álvares, Ilduara Medranho Gonçálves, André Seoane Antelo e José Manuel Dias Cadaveira configuram o renovado organismo de direcçom, à espera da incorporaçom das e dos reponsáveis comarcais nas próximas semanas e da Responsável Nacional da Mulher.

Passadas as 20h dava começo o acto de encerramento com a presença de delegados e delegadas das Organizaçons convidadas: AGAL, AGIR, BRIGA, Baiuca Vermelha, AMC, AGARB, Associaçom de Amizade Galego-Cubana Francisco Vilhamil, Movimento pola Base, Galiza por Palestina, CS Gomes Gaioso, Fundaçom Artábria, AVV Sam Vicente e Canedo, Gentalha do Pichel, Primeira Linha, PCPG, ACO Maçarico, AC Semente Vermelha e Siareir@sGaleg@s.

Desculpároma sua ausência e encaminhárom umha saudaçom Corrente Vermelha, COSAL, SCD Condado, LNB e a Associaçom Verbo Xido Terra de Montes.

Também estivo presente no acto final da V Assembleia Nacional a Consul Geral da República Bolivariana da Venezuela na Galiza, Mónica Chazín Fuenmayor. Alejandro Fuentes Hernández, Consul Geral da Repúblicade Cuba no nosso país, encaminhou um correio desculpando nom poder assistir.

O companheiro Alberte Moço protagonizou o discurso final, muito aplaudido polas pessoas presentes, que verificárom a estabilidade e a madurez com que a militáncia da esquerda independentista acordou encetar umha nova fase em que o trabalho deverá aumentar em quantidade e qualidade, fazendo assim frente às condiçons adversas que o sistema e a ideologia dominantes incutem no povo trabalhador galego.

A língua, o afám imperialista ianque na América Latina e a crise capitalista com a sua incidência nas trabalhadoras e trabalhadores galegos fôrom alguns dos textos aprovados em forma de resoluçom, junto ao regulamento e às teses organizativa, ideológica e política.

Nom duvidamos da alta produtividade política do encontro assemblear, cujos frutos ajudarám ao avanço da Galiza independente, socialista e nom patriarcal que sonhamos.