Oito pessoas que protestavam contra a presença dos ultras antigalego no nosso país fôrom detidas pola polícia espanhola durante a manifestaçom de ‘Galicia Bilingüe’. Há umha hora, mais duas pessoas fôrom detidas quando caminhavam pola rua, na capital do nosso país. Trata-se de Abraám Alonso Pinheiro, membro da Direcçom Nacional de NÓS-Unidade Popular, e de Xane Rios Bergantinhos, da organizaçom juvenil BRIGA.

Estes dous companheiros vírom denegada a assistência jurídica que lhes corresponde, e permanecem detidos nos calabouços da esquadra policial de Compostela, junto às outras oito pessoas represaliadas por defenderem o nosso direito à língua. Do total de detidos e detidas, dous som membros da Direcçom Nacional de NÓS-Unidade Popular (Carlos Morais e Abraám Alonso Pinheiro).

Manifestaçom de apoio aos detidos

Às 17h30, umha manifestaçom percorreu as ruas de Compostela reclamando a liberdade de todos os detidos e detidas, concentrando-se em frente da esquadra policial. Umha faixa com a legenda “Defender a língua nom é delito” encabeçou a marcha.

Entretanto, um dos detidos, o companheiro Carlos Morais, tivo que ser conduzido ao hospital depois da forte agressom sofrida por parte dos polícias antes de ser detido. Nestes momentos, continua detido junto às outras pessoas, apesar de sofrer fortes dores de cabeça e enjoos devido à agressom policial.

Para amanhá, segunda-feira, às 9 da manhá, está prevista umha concentraçom em frente dos tribunais de Compostela, para denunciar a repressom contra quem defende o direito colectivo do povo galego à sua língua.